Колледжде әділет органдары қызметкерлерімен кездесу өтті

«Қазтұтынуодағының Қостанай жоғары колледжі» мекемесінде «Заң және тәртіп» идеологиясын іске асыру аясында 1-курс Құқықтану мамандығының студенттерімен Қостанай облысының әділет органдары қызметкерлерінің қатысуымен кездесу өтті.

Іс-шараға Қостанай облысы Әділет департаментінің әкімшілік бөлімінің басшысы Салтанат Аитова қатысты.

Кездесу барысында құқықтық мәдениетті арттыруға, заң талаптарын сақтауға және жастар арасында заңға бағынушылық мінез-құлықты қалыптастыруға бағытталған тақырыптық семинар өткізілді.

Семинар барысында Қазақстан Республикасының жаңа Конституциясының негізгі нормалары, заңнамадағы өзекті өзгерістер, сондай-ақ сыбайлас жемқорлыққа қарсы іс-қимыл мәселелері кеңінен түсіндірілді. Студенттерге құқық бұзушылықтардың алдын алу мен оларды бақылаудың маңыздылығы, сыбайлас жемқорлық қылмыстары үшін көзделген жауапкершілік және заң талаптарын бұзудың салдары туралы ақпарат берілді.

Сонымен қатар, әділетті, адал және құқықтық қоғам қалыптастырудағы жастардың рөліне ерекше назар аударылды. Студенттер жеке жауапкершіліктің, заңды құрметтеудің, сыбайлас жемқорлыққа төзбеушіліктің және белсенді азаматтық ұстанымның маңыздылығын талқылады.

Кездесу ашық диалог форматында өтті. Студенттер өздерін қызықтырған сұрақтарын қойып, құқық саласындағы өзекті мәселелер бойынша мамандардан түсініктемелер алды.

Осындай іс-шаралар жастардың құқықтық сауаттылығын арттыруға, азаматтық жауапкершілігін қалыптастыруға және студенттер арасында «Заң және тәртіп» қағидаттарын нығайтуға ықпал етеді.